SURING AKLAT: HELL UNIVERSITY

I. Panimula

   A.Pamagat

     Ang pamagat ng librong aking binasa ay Hell University na isinulat ni KnightInBlack. Para sa akin, naging Hell University ang pamagat ng librong ito dahil ang unibersidad na ito ay maraming mga nakatagong sikreto, ang mga sikretong ito ay kailangang alamin ng mga tauhan dahil kung ang mga sikretong ito’y makukuha sa iba hindi nila malalaman ang totoong kwento dahil laging may kulang sa lahat ng kanilang nalalaman.

     Ang unibersidad pa na ito ay maraming kaganapan gaya ng patayan at pagiging traydor ng mga guro at estudyante. Sa kwentong ito nabasa ko ang mga pinagdaanan ng mga tauhan sa loob ng unibersidad na ito, nakakatakot ang mga nangyari sa kanila at sinubok nito ang pagtitiwala nila sa bawat isa. Kaya masasabi ko na ang pamagat ng kwentong ito ay naayon dahil ang kanilang paaralan ay mala impyerno sa dami ng kasamaang naganap dito.

B. Uri ng panitikan at genre 

     Ang librong Hell University ay isang nobela, sapagkat ang mga tauhan, lugar at mga pangyayari sa kwento ay kathang-isip lamang at higit sa lahat binubuo ito ng maraming kabanata. Ang genre naman ng librong ito ay thriller/mystery dahil sa kwentong ito ay mapapaisip ka talaga sa susunod na mangyayari dahil napakaraming misteryo ang nangyari sa kwentong ito. Dahil sa mga misteryong nakatago sa kwento ay mas maeenganyo ang mga mambabasa na tukuyin kung ano nga ba ang mga ang dapat nilang matuklasan sa patuloy nilang pagbasa ng librong ito. 

C. Pagpapakilala sa may akda 

    Ang sumulat ng librong aking binabasa ay kilala bilang si KnightInBlack ang kaniyang pangalan ay isa lamang pen name, siya ay ipinanganak noong 1998. Siya ay isang lalaki na kadalasang nagtatago sa likod ng maskara, hindi dahil gusto niyang maging misteryoso ngunit dahil ito lang ang tanging paraan niya na kahit papaano ay ihiwalay ang kanyang mundo ng pagsulat sa kanyang personal na buhay. Siya ay isang manunulat na aktibo sa mga online writing platform, tulad ng Wattpad. Kilala siya sa kanyang mga akdang may temang romansa, fantasy, at mga kuwento ng kababalaghan. Nagsimula siyang sulatin ang kaniyang unang kwento, ang hell university sa edad na sa 17. Mula noon, nakapag-publish na siya ng 8 libro, kabilang ang 2 self-published na mga gawa. Ang estilo ng kaniyang pagsulat ay kadalasang tumatalakay sa mga emosyonal na karanasan, paghihirap, at pakikipagsapalaran ng mga tauhan sa mga di-pangkaraniwang sitwasyon.   

  II.    Pagsusuring Pangnilalaman

 A. Tema/Paksa 

    Ang tema o paksa ng librong ito ay pagbabago dahil sa mga nangyari sa kwento ang mga tauhan ay nagkaroon ng pagbabago sa kanilang buhay at pag-iisip, dala ng marami ang pagsubok na kanilang pinagdaanan sa loob ng paaralan. Sa kwentong ito ay binago din ng pagsubok ang sukat ng pagtitiwala ng mga tauhan sa isa’t isa. Madaming nagbago sa lahat ng bagay simula ng pumasok ang mga karakter sa loob ng paaralang Hell University at ang lahat ng nangyaring ito ay nagsilbing aral sa kanila.

B. Mga Tauhan, Tagpuan, Panahon

Mga Tauhan:

a. Zein Shion (Zein) -  Siya ang isa sa pangunahing tauhan at naging sekretarya ng SSG. 

b. Ace Craige (Supremo/Ace) - Kilala siya ng karamihan dahil siya ang presidente ng student council.

c. Matt, Jerome, Dave, Mia, at Vanessa - Sila ang mga kaibigan ni Zein na kasama niya sa pagpasok sa Hell University.

d. Madam Violet - Siya ang headmistress ng Hell University.

e. Nurse Cha - Siya ang madalas na tumulong sa mga kaibigan ni Zein kapag sila ay may karamdaman.

f. Onel Ty - Siya naman ang vice president ng Student Council.

g. Raze Silvenia - Siya ay lider ng Devil God Warrior.

h. Nazzer Lumia - Siya ang lider ng Black Blood Gang. 

                      

Mga Tagpuan:                         

a. Hell University - Ito ay misteryosong paaralan sa gitna ng kagubatan kung saan ay legal ang pagpatay.

b. Dormitory - Dito tumutuloy ang mga estudyante na nag-aaral sa Hell University.

c. Cafeteria - Dito nagkikita-kita ang magkakaibigan upang kumain at para kamustahin ang isa’t isa.

d. Gymnasium - Dito tinitipon ni Madam Violet ang lahat ng mag-aaral kapag mayroon siyang mahalagang sasabihin.

e. SSG Office - Dito nagkakaroon ng pagtitipon ang mga kasapi ng Student Council.

Panahon:

     Ang kwento ay naganap sa panahon ng pasukan ng mga mag-aaral ng senior high school. Kung saan nag enroll ang magkakaibigang sina Zein, Vanessa, Mia, Jerome, David at Matt. Hindi naging masaya ang kanilang unang araw ng pagpasok sa paaralang ito, dahil mas nangibabaw ang kuryosidad nila dahil sa pagtingin ng masama sa kanila ng mga estudyante rito.  Maraming pagsubok ang pinagdaanan nila sa paaralang ito at ang mga yon ay nagsilbing aral sa kanilang lahat.

 

C. Estilo ng pagkakasulat ng may akda 

     Ang estilo ng pagkakasulat ng may akda ay pasalaysay, dahil sa pamamagitan ng paggamit sa iba't-ibang salita at paglalarawan ay mas madaling naiisip ng mga mambabasa ang mga pangyayaring nagaganap sa kwento. Ang uri ng wikang ginamit naman ay ang di-pormal na mga salita. Dahil sa aklat ay makikita natin iba-iba ang mga terminolohiyang ginamit ng may akda at hindi malalalim ang mga salita ang ginamit dito kaya naman mas madaling maintindihan ng mga mambabasa kung ano nga ba ang nais iparating sa atin ng nobelang ito.

III. Pagsusuring Pangkaisipan

 A. Kakintalan/Kaisipan 

     Ang masasabi kong aral sa librong ito ay dapat hindi tayo naniniwala agad sa ibang tao. Dahil gaya ng nangyari sa mga tauhan sila ay biktima ng mga kasinungalingan at karamihan sa nakikilala nilang estudyante at guro ay may mga balak na gawing masama sa kanila. Kaya naman nararapat na kilalanin muna natin ang isang tao bago natin ibigay ang buong tiwala natin sa kanila, sapagkat ang mga taong ating nakikilala ay hindi natin alam kung sila ba ay makakabuti o makakasama sa ating buhay.

     Isa pang aral na nakita ko ay huwag tayong basta magtanim ng sama ng loob sa isang taong naglilihim ng sikreto sa atin. Tulad ng nangyari sa kwento na dahil sa pagtataguan ng sikreto ay muntik na mawalan ng tiwala si Zein sa kaniyang mga kaibigan. Lagi dapat nating isipin na hindi agad dapat natin pag-iisipan ng masama ang isang taong may sikreto sa atin, ang dapat nating gawin ay alamin kung ano nga ba ang dahilan ng paglilihim nila at unawain natin ang sasabihin nila pagkatapos ay tsaka tayo gumawa ng mga hakbang upang magkaroon ng solusyon ang mga bagay na hindi pagkakaunawaan.

B. Kulturang masasalamin 

     Katulad ng mga tauhan sa kwento ang bawat isa sakanila ay may sari-sariling problemang kinakaharap, ngunit mas pinili pa rin nila ang pagtutulungan upang mapadali ang paghahanap ng mga solusyon sa kanilang problema at hinidi rin nila kinakalimutan ang pagiging masiyahin kahit na madami silang problema. Kaya naman ang masasabi kong kulturang masasalamin sa akdang ito ay tulad nating mga Pilipino ay hindi mawawala ang pagtulong ng bawat isa lalo na sa ating pamilya, kaibigan o kakilala. Kahit gaano man kalaki o kaliit ang ating tulong na natanggap ay nagagawa pa rin nating magpasalamat sa isa’t isa. Isa pa rito ay ang pagiging masayahin ng ating kapwa Pilipino na kahit ano mang problema ang dumaan sa ating buhay ay hindi pa rin natin makakalimutan na ngumiti kahit na saglit lamang.

IV. Lagom

     Sa gitna ng kawalan, isang grupo ng anim na magkakaibigan ang napadpad sa misteryosong paaralan na nakatago sa mundo. Dahil sa kanilang kuryosidad ay pumasok sila sa loob ng paaralan, sinalubong sila ng head administrator at ikinagulat ng magkakaibigan ang sinabi nito na walang bayad ang paaralang ito at ang lahat ay libre. Ang lahat ng tao dito’y malayang gawin ang kanilang gusto.

 Ang paaralang ito ay may isang pinagbabatayan na panuntunan ito ay ang “Once you enter, there’s no turning back!”. Dahil pinasok ng magkakaibigan ang lugar na ito ay wala na silang nagawa kundi ang lumaban para sa kanilang buhay at upang alamin kung ano nga ba ang mga misteryong nakatago sa pamamagitan ng kanilang paraan.

V. Reaksyon at Mungkahi

     Ang aking libro ay nahati sa dalawang bahagi kaya naman ang aking bibigyang reaksyon ay ang unang bahagi lamang. At bilang isang first-timer sa pagbasa ng mga ganitong uri ng libro ay masasabi ko na maganda naman ang takbo ng kwento dahil may mga misteryosong pangyayari na agad na naganap sa iilang kabanata ng unang libro. Ngunit hindi ko pa masabi kung maganda nga ba ang kabuohan ng kwento dahil ang book 1 pa lang ang aking nababasa, umaasa ako na maging mas maganda at maging kapanapanabik pa ang mangyari sa ikalawang bahagi ng libro. Ang aking mungkahi naman para sa manunulat na si KnightInBlack ay sana sa susunod na pag publish niya ng kaniyang mga libro ay hindi na sana masyado magkaroon ng grammatical error at typos ang niyang gawang kwento. Sana din ay ipagpatuloy niya ang pagsulat ng mga kwento o nobelang katulad ng Hell University.

SULATIN #6

 

Ang Bawat Hakbang ay Pagsubok

    Ang aking nabunot na kasabihan ay Ang buhay ay parang saranggola kailangang hawakan ng maayos para hindi hindi lumipad kung saan-saan.  Sa kasabihang ito ang saranggola ay sumisimbolo sa mga pangarap at ang hangin naman ay sumisimbolo sa mga pagsubok na ating kakaharapin sa pag-abot ng ating mga pangarap. Alam kong hindi lamang ako ang may mga pagsubok sa buhay ngunit pati ang ibang tao ay nakakaranas ng mga pagsubok bago maabot ang kanilang mga pangarap.

    Kahit ako'y isang mag-aaral pa lamang marami na din akong pagsubok na napagdaanan. Isa sa mga pagsubok na ito  ay ang pagpili ko ng strand sa Senior High School, hindi madali ito para sa akin dahil hindi ko maiiwasan ang makaramdam ng pressure mula sa aking pamilya. Nahirapan ako dahil iba ang gusto nilang pangarap para saakin habang ako sa sarili ko alam kong iba  ang gusto ko, dahil ang gusto ko ay maging isang guro kaya dapat HUMSS ang aking pinili ngunit ang nais ng aking mga magulang ay ako'y maging isang engineer kaya mas pinili ko na lamang ang maging STEM student. Hindi ko maiwasang mangamba na baka hindi ko  kaya makipagsabayan sa iba, na baka mababa ang mga marka na makuha ko dahil hindi ko naman hilig ang Math at Science. Ako ngayon ay masaya kahit papaano dahil nakakakuha naman ako ng mga pasadong marka sa lahat ng asignatura at ang gagawin ko na lamang ay i-enjoy ang aking buhay bilang isang mag-aaral at dapat ay pagbutihan ko pa ang aking pag-aaral. 

    Sa buhay hindi mawawala ang mga pagsubok, kahit gaano man kalaki o kaliit ang mga pagsubok ito ay laging mayroong solusyon. Hindi dapat nating gawing hadlang ang mga pagsubok upang sukuan natin ang ating mga pangarap bagkus gawin pa natin itong inspirasyon upang mas maging matatag tayo sa pag-abot ng ating mga pangarap.

SULATIN #5

Ang Bawat Bagay ay Nakaayon

    Bilang isang mag-aaral masasabi ko na minsan ay may mga bagay na kahit anong pilit ko ay hindi ko makuha. Hindi lamang sa pag-aaral kundi pati na rin sa ibang mga bagay sa aking buhay. Noong ako'y bata pa nais kong magkaroon ng mga magagandang gamit gaya ng ibang mga bata ngunit dahil sa hirap ng buhay hindi ko nakuha ang aking gusto, nakakalungkot mang isipin ngunit wala akong magagawa kundi ang tanggapin na lamang  at magpasalamat sa mga bagay na mayroon ako.

    Kaya naman ang kasabihang "Kung hindi ukol, hindi bubukol"  ay nagsasabi sa atin na kung may nais tayong isang bagay na  maabot o makuha, mayroong mga pagkakataon na hindi natin ito makakamtan, sapagkat ang bagay na ito ay maaaring hindi nakalaan para sa atin. Libre lang ang mangarap ngunit hindi pwede na isisi natin sa iba ang mga bagay na hindi natin kayang makuha. Alam nating lahat na ang mga bagay na nangyayari sa ating buhay ay may rason kung kaya't nararapat na tanggapin na lamang natin na ang ibang ating gusto ay hindi natin maaabot, sapagkat ang mga ito'y hindi nakatakda para sa atin.

    Kung hindi man natin nakuha ang ating mga ninanais hindi ibig sabihin nito na wala ng halaga ang ating buhay. Libre lang naman sumubok ng ibang bagay, malay natin may mas malaki o mas maganda pa palang bagay ang nakatakda para saatin. Gaano man kalaki o kaliit ang natatanggap mas mabuti na tayo ay magpasalamat sa biyayang ating natanggap at tanggapin natin ito ng buong puso.

SULATIN #4

Hiraya Manawari

    Noong ako'y bata pa nangangarap ako na sana ay kasinggaling ko ang aking mga kaklase, ngunit sa totoo lang hanggang ngayon nangangarap pa rin ako, subalit ano nga ba ang aking magagawa? wala naman, kaya ang iisipin ko na lamang ay kahit hindi man ako kasinggaling nila ay kailangan ko parin magtiwala sa aking sariling kakayahan. Ang mga kakayahan kong ito ang paraan sa pagkamit ng aking mga ninanais sa buhay.

    Sa pagtungtong ko ng Junior High School, nakikita ko na parang masaya pala maging guro, kaya aking napagtanto na sa hinaharap ay gusto ko rin maging isang guro ito ay dahil gusto ko makihalubilo sa mga bata at syempre nais kong maibahagi sa ibang mga bata ang aking mga natutunan sa aking pag-aaral at sa aking buhay. Kung sakali man na magiging guro ako balang araw ay nais ko rin iparamdam at ipaalam sa kabataan ang kahalagahan ng pag-aaral. Pagkatapos ng aking pag-aaral ay maghahanap ako ng maayos na trabaho upang matulungan ang aking mga magulang at kapatid.

    Ngayon ako ay isang mag-aaral sa Senior High School, kailangan ko na pagbutihan ang aking pag-aaral ko sa ngayon upang makapasok ako sa magandang unibersidad pag tungtong ko ng kolehiyo. Alam ko na maaabot ko lamang ang aking mga pangarap kung ito'y aking pagsisikapan, kaya naman gagamitin ko ang aking mga kakayahan upang malampasan ko ang lahat ng mga pagsubok na magiging hadlang sa pagkamit ng aking mga pangarap. Gagawin ko ang aking makakaya upang magkaroon ako ng maganda at masaganang buhay sa hinaharap.

SULATIN #3

 

Bawat Pagkakamali ay Aral

    Sa awiting "Anak" ipinapahiwatig rito ang pagmamahal ng magulang sa kanilang anak. May isang bata na isinilang sa mahirap na pamilya, kahit na sila ay mahirap ang kaniyang mga magulang ay masaya simula pa lamang na isinilang ang kanilang anak. Lahat ng kanilang makakaya ay ginawa nila upang maging maayos at maging masaya ang kanilang anak.

    Sa paglaki ng kanilang anak napansin nila na nagbago ang pag-uugali nito. Naging matigas ang puso nito at laging sinusuway ang payo ng kaniyang mga magulang. Dumating ang araw na napariwara ang buhay ng kanilang anak at ito'y nalulong pa sa masamang bisyo. Labis na nasaktan ang kaniyang ina at napatanong siya sa kaniyang anak na kung bakit siya'y nagkaganyan.
    
    Sa bandang huli, bigla na lamang lumuha ang kaniyang anak at naisip niya na sobrang laki pala ng kaniyang pagkakamali. Pinagsisihan niya ang kaniyang mga maling desisyon at napagtanto na kailangan niyang magbago. Ang awiting ito ay nagsasabi sa atin na dapat nating sundin ang payo ng ating mga magulang dahil sila ang gagabay sa atin patungo sa maayos na landas.

SULATIN #2

 

Kilalanin mo Ako!

    

    Nais kong ipakilala sainyo si Rana, ang kaniyang buong pangalan ay Rana Rose R. Lim ipinanganak noong Oktubre 30, 2008, siya ay panganay sa apat na magkakapatid. Siya ay nagmula sa simpleng pamilya, pamilyang kagaya ng iba na mayroong problema, kulitan at kasiyahan. Si Rana  ay  isang batang masiyahin, madaldal at palakaibigan. Isa rin siyang batang maraming pangarap, syempre sino nga bang bata ang walang pangarap sa buhay. Ang hilig niyang gawin ay ang pakikinig sa musika at pagkanta. 

    Gaya ng sinabi ko hilig niya ang pagkanta kaya naman ang talento nito ay ang pag-awit, bata pa lamang ito ay kitang-kita mo sa kaniyang mga mata ang kasiyahan habang siya ay umaawit, hanggang sa kasalukuyan ay ito pa rin ang hilig niyang gawin dahil masaya siya kapag siya ay umaawit. Sa pag-aaral naman masasabi kong siya'y hindi kasinggaling o kasingtalino ng ibang mga bata, siya ay isang bata lamang na nagsisikap upang maging kasinggaling ng ibang mga bata. Simula elementarya madalang na siya ay makatanggap ng mga awards minsan ay may mga pagkakataon na hindi niya maiwasan na tanungin ang kaniyang sarili na "bakit hindi ako kasinggaling niya?" , "kaya ko din ba yung ginagawa nila?". Dati ay ganiyan ang laman ng kaniyang isipan ngunit ngayon, ang masasabi ko na lang ay malaki ang pinagbago ng batang ito dahil sa pagtungtong ng high school mas naging mahusay siya sa kaniyang pag-aaral, lagi na siyang nakakatanggap ng mga sertipiko at medalya. Siya ay masaya dahil kahit papaano ay naisip niya na kaya niya rin pala gawin ang mga bagay na nagagawa ng ibang mga bata.  Ang nais niya sa buhay ay maging masaya lamang kasabay nito ang pag-abot ng kaniyang mga pangarap.

    Muli siya ay si Rana at masaya akong maipakilala siya sa inyong lahat. Ang mensahe ko para sakaniya ay sana ipagpatuloy niya ang pagiging isang mabuting bata at kung ano man ang kaniyang mga napagdaanan sa buhay ay sana'y naging aral ang mga ito sakaniya. Pagsikapan pa sana niya lalo ang kaniyang pag-aaral upang matupad niya ang kaniyang mga pangarap.

SULATIN #1

 

Papel ng Isang Tulad ko

    "Anong layunin?", " Bakit nga ba kailangan kong tapusin ang aking pag-aaral?" Ilan lamang yan sa mga tanong na madalas pumasok sa aking isipan. Ako'y isang batang may pangarap, mga pangarap na kailangang pagsikapan, mga pangarap na...oo alam ko mahirap nga itong abutin, pero wala akong magagawa alam ko kasi na kahit anong hirap pa ang aking pagdaanan ang magiging magandang  bunga nito ay para rin sa akin at sa aking pamilya. Ang edukasyon ay isa sa magiging susi sa pagkamit ng tagumpay, bakit? dahil ang edukasyon ang magbibigay saakin ng mga kaalamang magagamit ko sa pag pag-abot ng mga pangarap at makakatulong ito upang mapaunlad ang aking sarili. 

    Ipapakilala ko ang aking sarili, ang masasabi ko ako ay hindi gaanong matalino pero patuloy akong lumalaban para makapagtapos ng pag-aaral, dahil naniniwala ako na hindi naman sukatan ang talino para masabi mo kung ikaw ay may mararating sa buhay o wala. Tayo ay nag-aaral para magkaroon tayo kaalaman, kaalaman na magagamit natin upang paunlarin ang ating sarili patungo sa maayos na bersyon ng ating buhay. Uulitin ko ang tanong ko sa aking sarili  "Bakit nga ba kailangan kong tapusin ang aking pag-aaral?". Marami akong dahilan pero babanggitin ko na lamang ang ilan,  una sa lahat ay nais kong suklian ang paghihirap na sinakripisyo ng aking mga magulang  upang ako'y mapag-aral, nais ko silang mabigyan ng maayos na buhay, ikalawa ay nais ko din na mabigyan ng magandang buhay ang aking sarili. Siguro'y isasama ko na din na ibig kong ipakita sa mga may matang mapanghusga na sa kahit anong hirap ng aming buhay ay makikita nila ang ako sa hinaharap ay nakapagtapos na ng pag-aaral.

    Alam kong marami pang taon bago matapos ang aking pag-aaral pero parang mabilis lang din lumipas ang mga taon,  parang kailan lang ay nasa kindergarten pa lamang ako pero ngayon ako ay isang mag-aaral mula sa Mataas na Paaralan ng Sta. Lucia kasalukuyang nasa Senior High School.  Malayo na ang aking nilakbay at hindi pa rito natatapos ang lahat ng iyon, mas malayo pa ang dapat kong lakbayin at mas marami pa akong matututunan sa aking mga karanasan.